TACLOBAN CITY – Gin-aandam na han lokal nga pamunuan han San Roque ha Northern Samar an relief goods nga ighahatag ha mga pamilya nga nag evacuate tungod han waray wantas nga pag inuran.
Sumala kan Mayor Don Abalon han San Roque, Northern Samar maabot hin sobra 100 nga mga indibidwal an ira gin evacuate tikang ha upat nga interior nga barangay ha ira bungto tungod hiton pagbabaha.
Ini nga mga barangay amo an Pagsang-an, Lawaan, Malobago,Ginagdanan ngan puros ada ha ligid han Bantayan river.
Ha pagkayana in namumutos na hin mga relief items an pipira nga empleyado han munisipyo para ighatag ha mga pamilya ha pagtikang han ira relief operations.
Padayon naman nga nakaalerto an mga opisyales han mga barangay ha posible nga pag overflow han pipira nga mga sapa.
