TACLOBAN CITY – Patay an usa nga lalaki ha Brgy. Cambahanon, Alangalang, Leyte mahuman nga panawtawon mahitungod hiton boboa o lanzones.
Ginkilala an mga dabi han insidente kanda Macario Canillas, an tag-iya han puno han lanzones, an suspek in ginkilala kan Michael Canillas, bugto han tag-iya han lanzones, ngan an biktima naman in ginkilala kan Rodolfo Castil, an nangawat han lanzones.
Sumala kan Brgy. Cambahanon Chairman, Antero Badion, nagreklamo ha barangay hi Macario Canillas kasumpay ha pangawat han lanzones han biktima nga hi Rodolfo Castil kun diin nag-request ine hin pagtuhay haira nga duha ha barangay.
Umatender naman an biktima na nasabi nga pagtuhay kun diin na-settle naman ine han duha nga parte mahuman nga mangaro hin pasaylo ni Rodolfo Castil kaupod an iya asawa kun diin ginpasaylo naman ine ni Macario Canillas.
Dida han tipakadto na ha ka-sagingan an biktima in nakatapo hine ha dalan an suspek nga hi Michael Canillas kun diin didto na nahitabo an panawtaw.
Ugsa an panawtaw in mayda daw nakabati nga nagpakiana an suspek ha biktima kun anu an nagin resulta han pagtuhay, pero waray na daw maklaruhi an nagin baton han biktima.
Samtang, boluntaryo naman nga nagsurender an suspek ha mga kapulisan kun diin desidido naman an pamilya han biktima nga magpasaka hin kaso ha suspek.
