TACLOBAN CITY – Usa nga lalaki ha Brgy. Sua, Daram, Samar an patay mahuman nga pamun-on han iya kainom.
Ginkilala an biktima kan alyas Juan, 44-anyos an pangidaron, ngan residente han nasabi nga barangay. Samtang, ginkilala naman an suspek kan alyas Seb, 50-anyos an pangidaron, ngan residente gihapon han nasabi nga barangay.
Sumala kan Daram Municipal Police Station Chief of Police, PLTCOL Norman Ala, posible nga magkilala la an suspek ngan biktima mahitungod nga parehas an apilyedo an mga ine.
Basar naman hiton imbestigasyon, nagtatagay an suspek ngan an sangkay hine ha balay han suspek han tigda nga umabot an biktima nga nakainom-inom na gidaan kun diin ginyaknan ine han suspek kasumpay han ira kag-anak nga pag iinaringasahan daw ine han biktima yana nga nakainom-inom ine.
Nag-isog an biktima ngan gumawas ine ha balay han suspek nga nag ginuliat ngan lumakat naman ine kahuman. Pagbalik han biktima in mayda na ine dara nga sundang ngan gin prubaran pagtigbasa an suspek pero waray ine maka-igo.
Samtang, an suspek in mayda naman gidaan nga dara nga ice pick kun diin gin panmuno hine an biktima nga nag-angkon hin lima ngada ha unom nga binun-an rason han dayon hine nga kamatayon.
Ha pagkayana in presente nga nakapaslak ha Daram Municipal Police Station an suspek.
