Patay an usa nga lalaki mahuman ini panmusilon ha Barangay 3, Maydolong, Eastern Samar, dida han mga nakalabay nga adlaw, samtang dakop naman han mga otoridad an usa ha mga suspek han panmusil.
Ginkilala an biktima kan alyas “Andre” 25-anyos, ngan residente han Metro Manila, samtang an mga suspek kan alyas, “Nic”, 25-anyos ngan residente han Talayan, Maguindanao kun diin, nadakop ini pinaagi han hot pursuit operation nga gindumara han mga rumesponde nga kapulisan, ngan kanda alyas “Juni” nga taga-Mindanao, ngan “Marven” nga parehas aada ha mga legal nga pangidaron.
Basar han impormasyon, nga dida han pag-agi han biktima kaupod han iya uyab ha lugar han insidente, in gintapo ini han tulo nga kalalakin-an ngan tigda nala ginpusil ni alyas “Nic” an biktima kun diin, nakag-angkon hin walo nga inig-han hin bala an biktima ha magkadurudilain nga parte han lawas hini.
Dayon naman nga pumakadto ha lugar han insidente an mga kapulisan mahuman nga makakarawat an mga ini hin report. Pag-abot naman nira ha lugar han insidente in kumaligiw na an mga suspek gamit han ira 4-wheel get-away vehicle nga natad-an naman nga gin-abandona ha kakarsadahan han Balangkayan.
Gindara pa an biktima ha kahirani nga ospital agud tagan hin kaangayan nga atensyon medikal pero gindeklara ini nga dead on arrival han attending physician hini.
Mahitungod naman hini, dayon nga nagdumara hin hot pursuit operation nga hinungdan han pagkaka-aresto han usa nga suspek ha checkpoint harani ha San Juanico Bridge.
Basar ha imbestigasyon han mga kapulisan, ginkikita nga love-triangle an motibo han panmusil.
Ha pagkayana, in kapot na han mga kapulisan hi alyas “Nic” kun diin maatubang hin kaangayan nga kaso, samtang padayon naman nga ginhahalpat han mga otoridad an duha nga suspek nga nagpapabilin nga at large.
