METRO MANILA – Nagin mapaso an deliberasyon ha Kamara de Representantes kasumay ha hangyo nga imbestigaran an bug-os nga financial picture ni Vice President Sara Duterte, partikular na an pagpapagawas han subpoena para ha mga negosyo ngan law firm nga may konkesyon ha iya.
Panuyuan han balaudnon nga maimbestigaran an kariko han Bise Presidente tikang han magtikang ini ha public office kumo vice mayor dida han 2007 kutob ha pagkayana.
Sumala kan Bicol Saro Partylist Terry Ridon, kaupod han imbestigasyon an mga kumpanya nga nakalista ha 2023 ngan 2024 Statement of Assets, Liabilities, and Net Worth (SALN) han bise presidente, kaupod na an Geometry, Security, Anyanan Shores, ngan Cable Tow.
Umalma naman hi Cagayan de Oro Representative Rufus Rodriguez ha mao nga pitad ngan gintawag an pagdungog kumo usa nga fishing expedition.
Ginkuwestiyon hini kun kay-ano papadad-an hin subpoena an usa nga law office tungod nga posible matakpan an privilege communicaiton ha butnga han abogado ngan kliyente.
Kumo baton, ginklaro ni Ridon nga dire sakop han imbestigasyon an mga pribado nga pag-hisgot o kaso han mga kliyente han law firm.
An mga dokumento la nga ginsusumite ha Securities and Exchange Commission sugad han audited financial statements ngan general information sheets an ginaaro han komite agud makit-an an financial output hini.
Dugang pa hini, importante nga makuha an mga dokumento agud maberipika an paglobo han networth han bise presidente, nga kadara-san ginrarason han iya mga taga-suporta kumo ginhalin ha mga mao nga negosyo ngan law firm.
