TACLOBAN CITY – Padayon an pandestribwer han Department of Social Welfare and Development Region 8, hin bulig pinansyal ha pamamagi han Emergency Cash Transfer para ha mga pamilya nga naapektaran han nakalabay nga Bagyong Tino ha Sinirangan Bisayas.
Sumala kan DSWD-8 Information Officer, Atty. Jonalyndie Chua nga damo nga mga indibidwal an naapektaran ha probinsya han Leyte, kun diin nagbuhat hira hin payout ha 11 nga mga munisipalidad sugad hiton Dulag, Mahaplag, Tanauan, Mayorga, Javier, Merida, Hindang, Isabel, Inopacan, Baybay City ngan Ormoc City.
Dugang pa han opisyal nga ginbabase nira ha ira damage report an matatagamtaman nga cash-aid han benepisyaryo kun diin aada ha P10,170 para ha totally damaged houses ngan P5,085 naman para ha partially damage nga balay.
Panuyuan mangud han ECT nga matagan hin ayuda ngan mabuligan an mga biktima han kalamidad ha ira pankinahanglan ngan suportaran an utro nga pagtukdaw han ira mga pakabuhi ngan pagtindog utro han ira mga kabablayan.
Samtang sumala naman kan Atty. Chua nga nagpapadayon pa iton ira pandestribwer han cash-aid ha rehiyon nga kun diin, sumala hini, nga kinahanglan nga matagan nira an mga biktima ugsa naman mahuman an presente nga tuig.
