TACLOBAN CITY – Nagpahayag hin interes nga mag invest ha coco sugar industry ha Eastern Visayas an usa nga kompanya tikang ha South Korea para mabuligan an mga parag uma hin lubi nga apektado ha paghibubo han presyo heton lugit.
Sumala kan Wang Kee Baek, corporate lawyer han Global Ocean Best Associates Korea Co.,nakipaghimangraw na hira ha Philippine Coconut Authority sugad man kan Leyte Governor Dominic Petilla para iglatag an ira plano nga magbutang hin planta ha Leyte nga magpoproseso han ig-export an coco sugar ha ira nasod.
Sumala ha research han Food and Nutrition Research Institute han 2017,an coconut sugar in mas hitaas ha iron, zinc, nga calcium kon igkukupampara ha granulated sugar ngan high-fructose corn syrup.
Positibo naman daw hira nga kakarawtan han gobernador an ira ideya tungod nga dako iton potensyal han coco sugar ngan maupay liwat ini ha panlawas.
Labot la hini in hibubo gihapon ini ha glycemic index (GI) nga nagpapaubos ha blood glucose level ngan riko ha phytonutrients ngan antioxidants, sugad nala han polyphenols, flavonoids, ngan anthocyanidin.
Dugang pa ni Baek, andam hira nga makigkooperar ha goyerno, magbiling hin local partner ngan umentra ha public private partnership para liwat mabuligan an mga parag uma hin lubi nga mas dumako pa an ira income.
Usa daw nga rason kon kay anu nga nagpapabilin nga pobre an kadam-an ha mga parag uma hin lubi tungod nga hibubo iton presyo han lugit.
“The big problem why the filipino coco farmers are poor because the farm gate price of copra is very low and eve the mill gate price is very low”, pahayag ni Baek ha usa nga interview.
Mababaruan nga nagmumulay ha 11 pesos kutob 13 pesos iton farm gate nga presyuhan han lugit ha Sinirangan Bisayas.
An paghibubo ha presyo hini in nakadepende ha world market nga nakakaapekto liwat ha 367,234 nga mg coconut farmers.
Sumala ha report han Philippine News Agency,ginbabana bana nga aada ha 1.83 million katawo o kon hirani katunga han 4.4 million nga populasyon ha Sinirangan Bisayas in nakadepende ha lubi an ira pakabuhi.
Kon magkakaada hin planta hin coco sugar ha rehiyon diri la income hiton parag uma iton madudugngan kundi damo liwat nga tawo iton magkakaada hin trabaho.
Mababaruan nga an grupo nira Baek, in usa la ha mga negosyante nga nagpartisipar ha ginbuhat nga tulo kaadlaw nga 28th Visayas Area Business Conference ha Oriental Hotel, Palo, Leyte kon diin gindisplay liwat nira ha exhibit an iba iba nga mga produkto tikang ha South Korea nga plano nira igpakilala ha merkado han Pilipinas.
