TACLOBAN CITY – Ginpanhimuwa han katugbang ha pulitika ni anay Calbayog City Mayor Ronaldo Aquino nga dabi hiya ha pagpatay han mao nga alkalde.
Ha usa nga interview, ginpahayag han anay konsehal han Calbayog City nga hi Raymund Uy nga iya igkakalipay kon tatagan hiya hin higayon nga maghatag hin testimonya ha Senado para malimpyo an iya ngaran.
Una hini, durante han gindumara nga hearing han Senate committee on public order and dangerous drugs dida han nakalabay nga Hunyo 9, ginpahayag ni Police Master Sergeant Jose Jay Senario, usa nga intel operative han Calbayog City nga ginsugo hiya ni Raymund Uy nga maghimo hin affivadit nga magduduon kan Mayor Aquino kumo protektor han mga pulis nga dabi ha illegal drug trade.
Gindig-unan naman ni Uy nga waray hiya kalabutan ha pagpatay kan Mayor Aquino ngan diri daw niya personal nga kilala hi Police Master Sergeant Jose Jay Senario.
Dugang pa hini nga waray hiya maghatag hin 50k pesos kan Senario tarihas ha ginyakan hini nga ginbayaran hiya ni Uy ha sakob mismo han panimalay han dati nga konsehal.
Ha pagkayana in nagkonsulta na hi Uy ha iya abugado para ha posibilidad nga pagpapasaka hin kaso ala kontra ha mao nga pulis.
Samtang, gin-amin naman ni Uy nga tikang han gumawas an mga balita nga may kalabutan ha pulitika an pagpatay kan Mayor Aquino ginlalauman na daw niya nga madadabi an iya ngaran.
Hi Uy, in myembro han Partido Demokratiko Pilipino-Lakas ng Bayan (PDP-Laban) kun diin kumandidato ini katugbang ni Mayor Aquino han Liberal Party (LP), dida han 2019 elections.
Hiya gihapon in kaalyado han mga Tan, an political clan nga nagkokontrol ha probinsiya han Samar nga kontra partido liwat nira Mayor Aquino, Samar Rep. Edgar Mary Sarmiento, ngan pira pa nga mga local nga opisyales han Samar ha ilarom han Liberal Party.
Hiya gihapon an nagserbi kumo konsehal ha Calbayog City hin tulo katermino tikang dida han 2007 kutob 2013.
