TACLOBAN CITY – Pira nga kaso hin African Swine Fever an nahipatik ha bungto han Calbiga, Samar kun diin tulo na nga baboy an nahi-report nga namatay.
Sumala kan Dr. Juan Paulo Cabueñas, Municipal Agriculturist hiton Calbiga Samar, dida han nakalabay nga semana in mayda nag-report ha ira buhatan kasumpay han namatay nga baboy pero an problema daw hine kay gin-ihaw pa an nasabi nga baboy kun diin an ulo hine in gindara pa ha Zumarraga, Samar sanglit nagsarang daw ine.
Dayun naman nga nagdumara hin blood collection an nahitutungdan nga buhatan ha nasasalin nga duha nga baboy nga kaupod han namatay.
Ginbutang naman ha Red Zone an Brgy. Calingonan kun diin nagtikang an namatay nga baboy. Igindidire gihapon an pagbaligya, pag-ihaw, ngan pagbiyahe hin patay o buhi nga baboy pagawas ha nasabi nga barangay.
Ada naman ha Yellow Zone an Brgy. San Ignacio, Calayaan, Timbangan, ngan Canticum kun diin pwede naman an pagbaligya han baboy pero kinahanglan hin certification o katugutan tikang ha barangay
Samtang, ada naman ha Green Zone an mga nasasalin nga barangay han Calbiga nga harayo na ha area kun diin gintutugutan gihapon an pagbaligya han baboy basta mayda certification tikang ha barangay.
Mahugot naman an gindudumara nga monitoring han Municipal Agriculture Office kasumpay han nasabi nga insidente han pagkamatay han mga baboy.
