TACLOBAN CITY – Gin dugangan an mga gin pasarang nga mga kapulisan ha bug-os nga syudad mahuman an mga nahitatabo nga pan-hold up ha magkaduru-dilain nga parte han syudad.
Sumala kan PCol Michael Palermo, City Director hiton Tacloban City Police Office, mahitungod nga nagtitikadamo na an tawo ha syudad mahitungod hiton nagtitikaharani nga kapistahan in gindugngan na an mga nagpaka-augment nga kapulisan pero dire la daw ine mahitungod han kapistahan kundi pati na gihapon han mga krimen nga nahitatabo ha syudad.
Ada naman ha usa ka-platoon nga tikang ha region an nahidugang ha mga ginpasarang kun diin ada ine ha 50 kabug-os nga kapulisan nga pandugang para ha police visibility han syudad.
Samtang, nanawagan naman ine ha publiko o ha kun hin-o man an nakakakilala o makakakita han suspek nga nagprubar nga man-hold up ha usa nga pawnshop nga igpasabot ha ira buhatan agud masolbar an nasabi ng insidente.
