BORONGAN CITY – Ginpahimatngon ni Megan Villanueva, STI-HIV Program Coordinator han Eastern Samar, nga usa ha mga pangunahon nga hadlang ha padayon nga pagkontra han HIV in an stigma ngan diskriminasyon.
Gintagan duon ni Villanueva nga an kahadlok ha publiko nga mapuna o mapahiya an usa ha mga pangunahon nga rason kun kay-ano nga mas damo la gihapon an umiiwas han pagpapa-check han ira HIV status.
Ikaduha, may-ada mga lugar nga hirayo ngan makuri an access ha testing centers.
Dugang pa niya, dako gihapon nga problema an kakulangan han edukasyon labi na ha mga kabataan.
May-ada gihapon hiya naka-istorya nga mga kabataan nga may STI, an waray sakto nga hibabruan hini nga sakit.
Ika-tulo, an pagiging curious ngan pagka-inosente han kabataan in usa gihapon nga rason kun kay-ano nga naabuso ngan nae-enganyo an mga ini ha delikado nga buruhaton.
Kasumpay hini, gina-aghat ni Villanueva iton publiko, labi na an mga kabataan, nga magpa-test ha mga Rural Health Units (RHU) ha ira kada tagsa nga munisipalidad, ha Eastern Samar Provincial Hospital, ngan ha Provincial Health Office.
Libre daw iton test. Ngatanan in waray bayad tikang ha test, ha gamot, ngan mga laboratories nga kinahanglan.
Naghatag gihapon ini hin paalala han mga pamaagi agud makaiwas ha sakit sugad han abstinence, pagiging faithful ha partner, paggamit hin condom, nga dire paggamit han droga.
Pahayag ni Villanueva, an HIV testing in dire la para ha LGBTQ community kundi para ha ngatanan – mapalalaki, babaye, ngan burod. (via Bombo Shiela Encio)
