Malinangpuson nga narekupo han gintampo nga tropa han 87th Infantry Battalion ngan 804th Manuever Company, RMFB8, an usa nga abandonado nga kaha hin armas ha Sitio Galutan, Brgy, Can-aponte, San Jose de Buan, Samar dida han mga nakalabay nga adlaw.
Narekupo han mga ini an duha nga AK-47 rifles, duha nga M16A1 rifles, usa nga M203 grenade launcher, ngan mga magazine kun diin, ini nga mga armas in posible gingamit agud panarhog ha mga kahirani nga komunidad.
An malinangpuson naman nga operasyon in mahitungod ha impormasyon nga ginhatag han mga anay miyembro han walhon nga grupo ngan han mga residente han lugar.
Sumala ha mga kasundaluhan nga an ira mga gindudumara nga operasyon in mahitungod han nagtitikakusog nga suporta han komunidad agud maiduso an kahimyang ngan katalwasan ha mga lugar ngan pagdi-dire ha idelohiya han walhon nga grupo.
Samtang, padayon naman iton operasyon han tropa han gobyerno agud masigurado nga magigin “insurgency-free” iton Sinirangan Bisayas.
