TACLOBAN CITY – Ada na ha maupay nga kabutang an usa nga Kagawad han Ormoc City, mahuman ine nga pusilon ha sulod han iya sarakyan ha Rotonda han Simangan, Brgy. San Pablo, Ormoc City.
Ginkilala an biktima kan Ramie Matuguina, 49-anyos, inisaw-an, Brgy. Kagawad han Brgy. Salvacion Ormoc City.
Sumala kan PLTCOL. Ramil Amodia, Information Officer, Ormoc City Police Office, nga nakuha ha crime scene an 2 nga
basiyo hiton bala han 45 nga pistola.
Subay ha imbestigasyon, sakay an biktima ha iya sarakyan, han tigda ine nga pagpusilon han 2 nga suspek nga nakasakay ha motorsiklo ngan nagpaka- bonet pa an mga ine.
Ha mao nga panhitabo nakag-angkon hin minor injury an biktima, ngan yana in padayon nga nag-papaupay.
Mababaruan nga usa nga drug surenderee an nasabi nga biktima ngada han tuig 2016.
Hapagkayana, padayon pa an ginhihimo nga imbestigasyon han mga otoridad kasumpay ha mao nga shooting incident.
