TACLOBAN CITY– Ginkalasan hi Rachel Sabando, nanay ni Chrisia Mae, kasumpay hiton pagkakakuha han iya anak hin gold medal ha kategorya nga secondary girls 3,000-meter run ha Palarong Pambansa nga nagpapadayon ha n Ilocos Norte.
Ha pakikipaghimangraw han Bombo Radyo Tacloban ha nanay ni Chrisia, proud ine ha iya anak nga nakagdara hin syahan nga gold medal ha Sinirangan Bisayas.
Ginpaangbit pa hine, nga hi Chrisia in usa nga bata nga agresibo, determinado ngan may hingyap ha kinabuhi.
Waray naman maitago han kag-anak an duro nga kalipay ngan pagtuok ha nagin kadaugan han ira anak, labi na nga tikang hira ha kablas nga pamilya.
Naghatag naman ine hin mensahe ha iya anak nga dire pasagdan an kalugaringon samtang aada ha training ngan magpadayon ha iya hingyap kutob ha mga masunod pa nga kompetisyon nga may kahadlok ha Ginoo, ngan determinasyon.
