TACLOBAN CITY – Nagtutuo an alkalde han Jipapad, Eastern Samar nga dako an naibubulig han mahugot nga pagpatuman han mga quarantine protocols ha ira lugar agud nga mapugngan an pakasulod han COVID-19 ha ira bungto.
Una hini, an Jipapad, Eastern Samar an nabibilin nga munisipalid ha bug-os nga Sinirangan Bisayas nga waray pa bisan usa nga COVID-19 case nga nahipatik.
Sumala kan Jipapad Mayor Benjamin Ver, ha 234 nga mga LSI nga nanguli ha ira bungto kun diin 35 an ginpailarom ha swab testing, waray bisan usa nga nagpositibo ha mao nga virus.
Nagtutuo ini nga dako an bentahe ha iya pagiging doktor ngan sugadman an mahugot nga pagpatuman han protocols ngan pagbabantay ha border control points han ira lugar agud nga mamentinar an ira pagiging COVID-19 free.
