Usa nga insidente han panaw-taw nga nagresulta han pagkamatay han usa nga lalaki an nahipatik ha Brgy, Naulayan, Matag-ob, Leyte dida han kulop han mga nakalabay nga adlaw.
Ginkilala an biktima kan alyas “Nilo”, 45-anyos, samtang an suspek naman in gin kilala kan alyas “Des”, 62-anyos, parag-uma, step-father han biktima ngan residente han nasabi nga lugar.
Subay han impormasyon, aada ha impluwensiya han makahurubog nga irimnon an biktima han magprubar ini nga tigbason an ayam han iya stepfather ha gawas han panimalay hini gamit an 24 ka-pulgada nga sundang.
Ginpugngan naman han suspek an biktima agud dire ini patayon an ayam, pero nag-amok an biktima ngan gintigbas an suspek nga hinungdan han pag-angkon hini hin halarom nga samad ha wala nga kamot.
Mahitungod han panhitabo, nagsirom an pangitaan han suspek ngan naagaw hini an sundang han biktima kun diin, iya ginpananaw-taw ha magkadurudilain nga parte han lawas an biktima rason han dayon nga kamatayon naman hini.
Nasabtan han mga otoridad basar ha mga amyaw han duha, nga mayda pagkadelito an magtala-amay.
Samtang, gindakop naman han mga kapulisan an suspek mahuman nga magreport an usa nga concerned citizen ngan gindara ha Matag-ob MPS para ha insakto nga disposasyon.
