NATIONAL – Gintikangan na han Philippine National AIDS Council (PNAC) nga istudyohan an posibilidad nga dad-on ha nasod an lenacapavir, usa nga gintuturok nga tambal para ha HIV prevention.
Ini in ginrekomendar han World Health Organization (WHO) ngan gintutudlok nga “gamechanger” kontra ha nasabi nga virus.
An lenacapavir in usa nga long-acting injectable nga puydi igturok kada unom nga bulan ngan alternatibo ha adlaw-adlaw nga pagtumar hin tableta.
Sumala kan PNAC Executive Director Jojo Feliciano, nagdudumara na hin cost-benefit analysis an usa nga technical working group agud masabtan an bisa ngan kantidad han lenacapavir.
Samtang, iginpahayag gihapon ni Neoman Roxas han AIDS Healthcare Foundation Philippines, nga an Global Fund Country Coordinating Mechanism in nagtratrabaho agud makakuha hin siyahan nga batch han mao nga tambal ngan tikangan an proseso para ha DFA approval.
Ini in ha butnga han padayon nga panawagan ni Health Secretary Ted Herbosa kan President Ferdinand Marcos Jr. nga magdeklarar na hin public health emergency ha HIV kasunod han 564% nga paghitaas han bag-o nga kaso tikang tuig 2010 kutob 2024, labi na ha sektor han mga kabataan nga Pilipino.
