NATIONAL – Kumpiyansa an Bangko Sentral ng Pilipinas nga padayon nga mahinay an inflation o pagkiwa han presyo han mga produkto ngan serbisyo ha masunod nga tuig.
Ha pag-arangkada han budget briefing ha Kamara yana nga adlaw, Igin-pahayag ni BSP Governor Eli Remolona Jr. nga an averahe inflation ha 2025 in ginbabana-bana nga magmumulay ha 2 ngada ha 4 porsyente.
Sumala kan Remolona nga magpapabilin an “downward trajectory” ilabi na nga igin-patuman han gobyerno an Executive Order Number 62 nga may panuyo nga maibanan an rice import tariffs.
Pag-isplikar ni Remolona, dako an maibubulig han mas hamubo nga taripa ha rice imports tungod nga dako nga parte han nahipatik nga inflation rate an presyo han bugas.
Para makontrol ine, padayon naman nga papaupayon han gobyerno an food supply initiatives ipinaagi han tariff modification, importation measures ngan pagpapakusog ha agriculture productivity.
