TACLOBAN CITY – Gindudumdom ha pagkayana han grupo han mga parag-uma an nahitabo nga Palo San Agustin Massacre han tuig 2005.
Sumala kan Jun Berino, secretary general han Samahan han gudti nga parag-uma (SAGUPA), yana nga adlaw in eksakto ika-14 katuig han mahitabo an mao nga massacre kun diin siyam nga mga parag-uma an ginpatay nga tubtob yana in waray pa katatagi hin hustisya.
Dugang pa hini nga ira gintutuuhan nga mga kasundaluhan la mismo an nagpapaluyo ha pamatay ha mao nga mga ordinaryo nga mga parag-uma mahitungod nga ginsuspetsaran an mga ini han militar nga may dara nga mga armas.
Yana nga adlaw kaparte han pagdumdom han mao nga panhitabo, in nakatalaan unta nga magkaada hin dayalogo an pira nga grupo hin mga parag-uma kaupod an Department of Agrarian Reform (DAR) pero nakansela ini mahitungod nga may importante nga schedule an regional director.
Ginkokonsidera gihapon han mga ini an bulan han Nobyembre kumo Massacre month mahitungod nga daw damo nga mga parag-uma an ginpatay ha mao nga bulan han naglabay nga mga tuig.
