Ginklaro han Commission on Population and Development (CPD) Region VIII nga an padayon nga paghamubo han ihap han young population o mga kabataan nga edad 0 tubtob 14 anyos in may kalabotan ha pag-iban han total fertility rate ha nasud ngan ha Eastern Visayas.
Sumala kan Elnora R. Pulma, Regional Director han CPD Region VIII, dako an pagbag-o han fertility rate ha naglabay nga mga tuig, kun diin nagin mas gutiay an ihap an ginpapanganak han usa nga babaye samtang aada hiya ha reproductive age nga 15 tubtob 49 anyos.
Subay ha National Demographic and Health Survey han Philippine Statistics Authority (PSA), nag-stabilize na ha duha ka porsyento an fertility rate, nga nangangaruyag sidngon nga duha na la nga anak an ginpapanganak han usa nga nanay ha iya reproductive years. Kumpara ini ha naglabay nga mga henerasyon nga naabot ha lima o sobra pa an ihap han mga anak.
Ginpahayag ni Pulma nga usa ha mga hinungdan hini amo an pagbag-o han kahimtang han mga kababayin-an, nga yana mas damo an may mas hitaas nga edukasyon ngan may trabaho. Tungod hini, mas ginhuhuna-huna na han nira an kadamu han ira mga anak tungod han responsabilidad ngan gasto ha pagpadaku ha pamilya. Nabulig liwat an pagpauswag han family planning ngan reproductive health services ha paghimo hin mas maaram nga desisyon mahitungod han pagbuo hin pamilya.
Dugang pa ni Pulma, nakakaapekto liwat ha desisyon han mga pamilya an padayon nga paghitaas han presyo han mga panginahanglanon. Tungod han mas dako nga gasto ha pagpadaku ngan pag-eskwela han mga anak, posible nga mas ginpipili han mga mag-asawa an gutiay nga kadamu han anak, nga ha kaihaan nakakaapekto ha kabug-osan nga populasyon han kabataan ha rehiyon.
