TACLOBAN CITY – Dire gud damo an nahipatik nga ihap han mga pasaheros nga nanguli ha ira kada-tagsa probinsiya ha Sinirangan Bisayas para han pagsalin-urog han Undas.
Sumala kan LTFRB Regional Office 8, Transportation Development Officer II Veronica Reposar, nga basar han ira datos tikang han Oktubre 10 in normal an nagin operasyon han tanan nga mga pampubliko nga sarakyan ha rehiyon ngan supresyente gihapon an kadamo hini para ha mga pasaheros.
Dugang hini nga puno naman nga nalakat an mga sarakyan ha mga terminal pero dire gud ini overcrowded kumpara han mga nakalabay nga Undas ngan mga bakasyon.
Sumala pa kan Reposar nga usa nga nakikita nira nga rason han pag gutiay han volume han mga pasaheros in mahitungod han mga suspensiyon han mga biyahe dinhi ha Sinirangan Bisayas tikadto ha Metro Manila dida han mga nakalabay nga semana tungod han maraot nga panahon.
Eksplikar naman hini nga posible nga ginlilikyan han mga pasaheros an ma-stranded ha mga terminal ngan port labi na nga masukot mahipatik ha pagkayana iton mga bagyo.
Samtang, padayon naman iton ira assessment ha mga pasaheros nga mangunguli tipabalik liwat ha Metro Manila o kun ha iba nga siyudad tikang ha ira kada-tagsa probinsiya kutob Nobyembre 10
