TACLOBAN CITY – Naitala ha mga northern barangays han syudad han Tacloban an hitaas nga ihap han mga kabatan-onan nga nagbuburod hin timprano pa kun diin, an gin kikita nga rason in an hitaas nga populasyon ha norte nga dapit han syudad.
Basar ha naitala han City Population Office in maabot ha 392 cases han identified teenage pregnancies an may-ada an bugos nga syudad han Tacloban dida han tuig 2024, mas hitaas kumpara ha 338 nga ihap han 2023.
An mao nga datos in nag tikang ha mga naka rehistro nga live birth tikang ha city civil registrars kun diin, basar ha datos nga gin kakaptan han mao nga opisina in an mga kabatan-onan nga 19 anyos an pinakadamo nga ihap han teenage pregnancies sugad man an pinakabata nga naitala nga nanganak in 13 anyos kun diin, 12 anyos pala ini han mag burod.
Sumala kan Population Program Worker II Jemima Kezzia Dalore, basar ha gin himo nga survey han tuig 2018 magkadurodilain an rason kun kay ano hitaas an ihap han mga kabatan-onan ha syudad an sayo pa nga nagbuburod.
Usa ha mga rason hini in an mahitungod ha kyuryusidad nga hinungdan han kaburod hin sayo pa, sinundan naman ini hin maaga nga ka in-love nga rason hin pag engage hin sexual involvement. Aada pa an sense of adventure sugad man an sexual abuse.
Gin pasabot naman han opisina han City Population Office nga an responsible parenting nga programa han mao nga opisina in may panuyuan nga tutduan an mga kag-anak kun patiunan-o ig handle an mga anak. Kadungan hini an responsible parenting and family planning para ha nga mag teenage couple agud matutduan han importansya han family planning, pagpapadako hin bata sugad man kun patiunan-o maging responsable nga kag-anak.
Samtang gin tatalinguha naman han mao nga opisina nga magkaada hin teen centers an mga eskwelahan agud magkamay-ada hin safe place an mga kabatan-onan nga ira masusumatan kun may-ada man an mga ini problema nga gin kakaatubang ha ira kinabuhi. (via Bombo Niña Magpili)
