TACLOBAN CITY – Arestado an usa nga High Value Target (HVT) han mga otoridad ngan Philippine Drug Enforcement Agency (PDEA) region 8, mahuman an gindumara nga drug buybust operation ha Brgy. Cabarasan, Barugo Leyte.
Ginkilala an suspek kan Ryan Jay Acebo, 34-anyos an pangidaron, usa nga government employee, driver han sarakyan han MDRRMO, ngan residente han Brgy. Busay Barugo Leyte.
Sumala kan Rogellete Urgel, Information Officer hiton Philippine Drug Enforcement Agency, nakumpiskar ha suspek an duha ka-sachet han gin-aalegar nga shabu, nga mayda kabug-aton nga dire maubos ha 5.02 ka-gramo ngan mayda estimated market value nga P34,500.
Mag-aatubang naman an suspek ha kaso pagtalapas han RA 9165 o Comprehensive Dangerous Drugs Act of 2002.
Hapagkayana, temporarayo naman ine nga nakapaskal ha Barugo Municipal Police Station.
