TACLOBAN CITY – Posible mahuman na ha maabot nga duha ngada ha tulo kasemana an harvest season han humay ha rehiyon.
Ini in sumala kan Grains Retailers Confederation Eastern Visayas President, Frederic Dy mahitungod nga himurasak na o ada na ha kabutngaan an panharvest han mga parag-uma.
Kadungan hini, ada naman ha P23 ngada ha P24 an pamresyuhan han presko nga humay, pero ini nga presyo in tikang ha mga pribado nga mamaralit sugad hiton mga millers.
Dugang pa ni Dy, ini an syahan higayon nga ha pagtikang han harvest ngada ha paghikahuruman han harvest season in waray gud lumaprak ha hamubo nga kantidad an presyo han humay.
Dako naman daw ini nga bulig ha mga parag-uma mahitungod nga nag-aaragaw pa panmalit an mga private buyers ha mga parag-uma ha dako nga kantidad.
An negatibo la nga durot hini in maapektaran gihapon an presyo han bugas, kun diin mahitungod nga hitaas an pamalit han humay in mahitaas gihapon an presyo han bugas.
Dako gihapon an posibilidad nga mas humitaas pa an presyo han bugas kutob ha dayun nga kahuman han harvest season.
