TACLOBAN CITY – Nagpapabilin nga nakapailarom ha total lockdown an bug-os nga bungto han Guiuan, Eastern Samar mahitungod han padayon nga paghitaas han COVID-19 cases ha ira lugar.
Una hini, han naglabay nga adlaw in maabot ha 18 an naidugang nga panibag-o nga mga kaso hin COVID-19 ha mao nga bungto.
Sumala kan Guiuan Mayor Annaliza Gonzales-Kwan, an mao nga ihap han new cases in mga close contacts la han mga pasyente nga una na nga namagpositibo han COVID-19 sanglit ginlalauman nira nga madudugngan pa an ihap hini.
Ha pagkayana in mayda pa 40 nga mga close contacts nga ginpailarom ha swab testing nga padayon pa nga ginpapamulat an resulta han mga ini.
Nakadepende naman ha kadamo han local cases o community transmission an desisyon kun magkakaada hin ekstensyon han lockdown ha mao nga bungto.Nahibaruan nga nakatalaan nga maghuman an lockdown ha Guiuan yana nga Enero 13, sunod nga semana.
