SAN JOSE, TACLOBAN CITY – Patay na han madiskubrehan an usa nga guest han hotel ha sulod han kwarto hine ha Brgy. 88, San Jose, Tacloban City.
Ginkilala an biktima kan alyas Den, 52-anyos, government employee, ngan residente han Burauen, Leyte.
Sumala kan Tacloban City Police Station 1 Officer in Charge, PCpt. Anulfo Abayan, nakakarawat hira hin report kasumpay han nakit-an nga patay nga lawas ha usa nga hotel ha San Jose, kun diin dayun liwat ine nga gin respondehan han mga otoridad.
Subay han inisyal nga imbestigasyon, nadiskubrehan han room boy an patay nga lawas banda alas-12:20 han kulop dida han nakalabay nga adlaw.
Kun diin nagtuktok an room boy ha kwarto han biktima para unta pahinumdumon han iya pag-check out pero waray nabaton sanglit nagpabulig ine ha housekeeping personnel ha pag-abri han purtahan han kwarto.
Pag-abri han mga ine in didto nadiskubrehan an patay na nga lawas han biktima nga nakada han higdaan hine.
Dayun naman nga nagdumara hin imbestigasyon an mga otoridad agud mahibaruan an igin kamatay han biktima.
Samtang, nahibaruan gihapon nga mayda gin aabat nga sakit an biktima.
Pero para han ikasisigurado han pamilya han biktima in nag-hangyo an mga ine hin autopsy examination.
