TACLOBAN CITY – Mas duru-damo nga gold medal an nakuha han Tacloban City Division yana ha naghuman nga EVRAA Meet 2024 kumpara dida han nakalabay nga tuig-2023.
Sumala kan Dr. Nilo Eder, Information Officer hiton Department of Education Tacloban City Division, dida han nakalabay nga tuig in mayda la 19 nga gold medal nga nakuha an Tacloban City Division pero yana in nakag-uli ine hin 23 nga gold medal ha kahuhuman pala nga EVRAA Meet 2024.
Bisan paman kun waray hine makuha an kampeonato in napabilin naman hine an ira pwesto ha ika-tulo nga rank, kaparehas han nakalabay nga tuig.
Ha kabug-usan in nakag-uli hin 98 nga medalya an Tacloban City Division kun diin 23 hine an gold, 33 an silver, ngan 42 naman an bronze.
Samtang, makakakawarat naman hin insentibo tikang ha City Government of Tacloban ngan TINGOG an mga nagdaog nga atleta pero waray pa hine igpahayag kun pira an makakarawat han mga winning athletes.
