TACLOBAN CITY – Ginpasabot han Department of Education (DepEd) nga ira gintututukan an mga nagtitikahitaas nga mga kaso han teenage pregnancies o kun an mga estudyante nga nagbuburod agud nga mapugngan ini.
Sumala kan DepEd Regional Director Evelyn Fetalvero nga mayda nira ginpapatuman nga Comprehensive Sexuality Education (CSE) nga kun diin, igintututdo an may paghisumpay ha adolescent sexuality and reproductive health ha mga subjects sugad han Science, Values Education, ngan Social Studies.
Natuo manggud an ahensya nga diri la liwat problema han DepEd an teenage pregnancy kundi han mga magkadurudilain pa nga mga ahensya han gobyerno ngan han bug-os nga komunidad.
Pagpatapod naman ni Fetalvero nga naagi ha seminar an mga magturutdo nga makapot han CSE agud nga magin epektibo an mga ini ha pagtututdo in labi na nga age and development appropriate o subay han edad ngan an kapas han estudyante nga maka-intindi han leksyon parte ha sexuality.
Nanawagan an mao nga opisyal nga ha mga nahitutungdan nga ahensya, kag-anak ngan bug-os nga komunidad nga magburublig agud nga mapugngan an paghinitaas han ihap han mga batan-on nga nagbuburod.
