TACLOBAN CITY – Ginatos gatos nga mga motorista an na-stranded ha ha barangay Suhi, syudad han Tacloban tungod han tigda nga pagbabaha nga durot han padayon nga pag inuran nga naeeksperyensiyahan ha Sinirangan Bisayas.
![](https://img.bomboradyo.com/tacloban/2021/01/tacloban-city-flood-january-11-2021.jpg)
Sumala kan Jessie Domingo, usa ha mga motorista tikang ha Babatngon, Leyte, banda alas 7 pa han aga hira nastranded ngan diri nakakatabok tungod ha kahitaas han tubig ha mao nga lugar.Pira naman ha mga motorista iton napiritan nga baktason an kutob tuhod nga baha nga pira liwat an gintugwayan la anay an ira mga motor para makatabok ha tubig baha agud nga makasulod la ha trabaho.
Sumala naman kan Brando Bernadas, tagmangulo han Tacloban City Disaster Risk Reduction and Management Office ( CDRRMO ) nagpadara hin 3 nga truck ngan usa nga bus an Tacloban City government para sakyan han mga pasaheros ngan motorista agud nga makasulod hira ha trabaho.
Pira naman nga mga kapulisan ngan TOMECO an gindeploy ha mao nga lugar para magin hapsay an dalagan han trapiko.Labot la barangay Suhi, naeksperyensiyahan gihapon an pagbabaha ha Brgy 109 V and G Subdivision ngan pira nga parte han Bagacay.