Iginpagawas han Philippine Statistics Authority (PSA) an pinakabag-o nga datos tikang ha 2025 National Demographic and Health Survey (NDHS) nga nagpapakita han padayon nga pag-ubos han fertility rate han mga kababayen-an nga Pilipino ha 1.7 nga anak kada babaye, an pinakahamubo nga nahipatik nga lebel ha kasaysayan.
Tikang ha 4.1 nga anak kada babaye dida han 1993, padayon an pag-ubos han fertility rate ha nakalabay nga dekada.
Ha presente, mas hamubo na ini ha replacement level nga 2.1 nga kinahanglan agud mapabilin an presente nga populasyon, nga nagdudurot hin mga pamakiana kun patiunan-o maursa an populasyon han nasud ha masunod nga panahon.
Subay ha survey han ahensya, umubos an fertility rate ha parehas urban ngan rural nga lugar, kun diin an kababayen-an ha mga syudad in mayda average nga 1.5 nga anak, samtang an mga ada ha rural nga kumunidad naman in mayda 2.0 nga anak.
Pinakahitaas nga fertility rate ha Bangsamoro Autonomous Region in Muslim Mindanao nga 2.4 anak kada babaye, ginsundang han Region IV-A (1.3), National Capital Region, ngan Negros Island Region (1.4).
Iginpakita gihapon han survey nga kaurhian na yana ha prayoridad han mga kababayen-an an pagkakamay-ada hin anak. Pinaka-komon an panganganak ha edad nga 25 kutob 29, samtang hamubo an adoloscent fertility ha 22 nga panganganak kada 1,000 nga kababayen-an nga nag-eedad hin 15 ngada ha 19.
Umubos gihapon an teenage pregnancy nga mayda 4.9% han mga kabataan nga babaye nga nag-eedad hin 15-19 anyos an naka-eksperyensya han pagbuburod.
Nagawas ha survey nga mas damo han kababayen-an nga Pilipino an ginpipili nga magkamay-ada hin mas gutiay nga anak.
Subay ha datos, 57.3% han mga mayda asawa nga babaye an nagpapahayag nga dire nira karuyag dugangan an ira anak, samtang 13.4% la an karuyag pa hin usa nga anak ha masunod nga duha katuig.
Humitaas gihapon an paggamit han modern contraceptives ha mga may-asawa nga babaye ha 44.5%.
Sakop han 2025 NDHS an 29,694 nga kababayen-an nga edad 15-49 ha bug-os nga nasud, kaparye han sobra 30,000 nga kababayen-an nga ginkuha nira tikang 2022 kutob 2025.
Ha parehas nga konteksto han gastuson ngan kita han kada pamilya, nahipatik han PSA nga an average annual family income dida han 2023 in P353,230, samtang an average family expenditure naman in umabot ha P258,050.
