TACLOBAN CITY – Kun engrande an pag aabri han Eastern Visayas Regional Athletic Association (EVRAA) Meet 2024 dida han Lunes, Mayo 6, mahitungod han pagtapo han City Government han Ormoc ngan han mga bisita hine nga mga celebrity in waray naman mag paurhi an nagin Closing ngan Awarding Ceremony kun diin nagin bisita gihapon an bokalista han banda nga Eraserheads nga hi Ely Buendia.
Mahuman an pira kaadlaw nga pakikipagtumparak ha magkaduru-dialin nga mga sporting events kaupod na an Paragames, gin kilala nga Over-all champion an host city nga Ormoc City nga nakakuha hin 217 Gold, 118 Silver nga 76 bronze.
Ginsundan naman ine han Leyte Division nga nakakuha naman hin 162 nga kabug-usan nga medalya, 2nd runner up naman an Tacloban City Division nga mayda 98 total medals, 3rd runner up an Maasin City Division nga mayda 71 medals, ngan ada naman ha 4th runner up an Samar Division nga mayda 139 total medals.
Sumala kan Leyte 4th District Representative Richard Gomez, dida han mga nakalabay nga adlaw in nagkamay-ada hin higayon nga magtitiok an mga magkarit nga atleta han rehiyon para makuha an titulo han kampeonato.
Gintagan-duon gihapon ni Gomez an importansya nga mag invest ha mga atleta mahitungod nga usa ine nga higayon para mag alutaga gihapon ha kabubwason han mga atleta, ngan sugadman an pagkakamay-ada hin positibo nga outlet an kabataan.
Manunumduman nga nag alutaga hin P100-M nga budget an Ormoc City para ha pagdudumara han pinakadako nga sporting event ha Eastern Visayas.
Maabot naman ha 9,000 nga mga atleta ngan coaches nga nagtikang ha 13 nga dibisyon an umatender para han EVRAA Meet 2024 kun diin maabot ha 500 nga atleta an kwalipikado para ha Palarong Pambansa yana nga tuig.
