TACLOBAN CITY– Gin-aabisuhan han Eastern Visayas Medical Center (EVMC) an tanan nga publiko, nga kun dire emergency an usa nga pasyente in igdara ine ha mga lokal district hospital ha ira mga lugar.
Sumala Dr. Joseph Michael Jaro, Chief of hospital EVMC, dire nga nalikay hira ha mga pasyente, an ira la in dire magbugiot an EVMC, kun diin dire na nira naakomodar an ngatanan.
Dugang pa ni Jaro, an nahihitabo mangud nakadaras-an na han publiko nga igdara ha EVMC adton may mga sakit, bisan dire duro nga grabi, sugad hiton sakit han tiyan, ulo,,sip-on ngan ubo, ngan magin an mga napapangasan la in ha ira dayon gindadalagan ha ira agud nga umaro hin bulig medikal.
Gintagan duon hine, nga ha sugad nga sitwasyon nawawarayn gamit an mga district hospital, sanglit gin-aaghat hine an publiko nga unahon anay umaro hin bulig ha pinakaharani nga hospital ha ira munisipalidad, agud nga an mga ine an magdidisisyon kun kinahanglan ig-refer na buhatan han EVMC an usa nga pasyente.
Aminado an nasabi nga opsiyal, nga an ira emergency room ha pagkayana in puno na, ngan an iba ha mga ine in nagkakalingkod nala matungod nga waray na bakante nga higdaan nga pwede gamiton han mga pasyente.
Nananawagan an nasabi nga opsiyal, hin pakigbinuligay ha publiko, agud nga matagan hin bulig medikal an mas na-nginginahanglan nga pasyente.
