Usa nga lalaki an nahipatik nga nalumos samtang nakarigo ha kadagatan han Baras, Palo, Leyte in nasalbar pinaagi han madagmit nga pagresponde ni Eastern Visayas Medical Center (EVMC) Chief of Hospital Dr. Joseph Michael Jaro. Gintutu-uhan nga an edad han mao nga lalaki nga nalumos in 50 anyos .
Sumala kan Dr. Jaro, nahitabo an insidente samtang napahuway hiya ha mao nga lugar upod han iya immediate staff ngan organizing team mahuman han anniversary celebration han EVMC dida han Biyernes han gab-i. Ginpahayag niya nga nagdesisyon hira nga mag-relax anay tungod han kakapoy tikang ha sunod-sunod nga trabaho.
Samtang aadto hira ha baybayon, ginsumatan hiya han iya kaupod nga may lalaki nga ginbabana-bana nga na-stroke. Han ira pagkadto ha biktima, nasabtan nira nga diri stroke an nahitabo kundi pagkalumos.
Ginpahayag ni Dr. Jaro nga han iya pag-usisa han kahimtang han lalaki, waray na ini pulso, waray na pagginhawa ngan nag-angkon na hin cardiac arrest. Tungod han iya katungdanan sugad nga doktor, dayon hiya naghatag hin cardiopulmonary resuscitation (CPR) agud masalbar an biktima.
Ginpahayag niya nga tulo ka beses niya ginbuhat an CPR. Han siyahan nga higayon, bumalik an kiwa han kasingkasing han biktima ha sulod hin 15 tubtob 20 segundos pero waray la mag-iha ngan nawara utro. Han ikaduha ngan ikatulo nga CPR, nagpadayon na an pagbalik han pulso tubtob nga nakaabot an rescue team han Palo.
Han inabot an mga responder, nakakaginhawa na an lalaki bisan diri pa niya napupukrat an iya mata . Ginpabug-atan ni Dr. Jaro nga an madagmit nga paghatag hin CPR ha mga sugad nga insidente in importante basi madugangan an posibilidad nga mabuhi an usa nga nalumos antes pa madangat ha ospital.
