TACLOBAN CITY – Gin manduhan an Committee on Environment and Waste Management han syudad han Tacloban nga magpasa han ira report ha sulod han 30-diyas ha Sanggunian Panlungsod kasumpay han padayon nga problema ha basura han syudad.
Ine in kasunod han resolusyon nga ginsalawad ni Atty. Jerry Uy, nga panuyo papagbatunon an mga hintutuinan nga ahensya nga opisina, kaupod an CENRO Tacloban ngan an City General Services Office (CGSO), sugadman an mahugot nga panginano ha performance han mga service contractor nga nagmamangulo ha garbage collection.
Sumala kan Uy, nakakarawat an konseho hin damo nga reklamo tikang ha mga residente kasumpay ha mga natatambak nga basura, malain nga baho, ngan dire maupay nga iskedyul han koleksyon, labi na ha pira nga barangay nga nagdudurot hin hulga ha panlawas han publiko.
Ha sulod han gintalaan nga panahon, papanginanuon han komite kun nasusunod an mga kontrata ngan nagpapadayon nga balaod, kaupod an Ecological Solid Waste Management Act, ngan tutudlukon an posible nga pagkukulang ha pagpapatuman han waste management program han syudad.
Iginpaangbit gihapon ni Uy nga mayda pondo nga nagkakantidad hin purluminos P60 milyon ngada ha P85 milyon nga igin alutaga para ha waste management, pero dire ine naparehas ha kalidad han serbisyo nga nakakarawat han mga residente.
Gintagan-duon ni Uy nga panuyo han resolusyon nga trabahuon han konseho an oversight functions hine ngan maglatag hin mga konkreto nga pitad agud mapaupay an sistema han koleksyon han basura ha syudad, nga mayda direkta nga epekto ha panlawas ngan kabutang han publiko.
