NATIONAL – Iginpahayag han bag-o nga tudlok nga sekretarya han Department of Energy (DOE) nga hi Energy Secretary Sharon S. Garin an iya pasasalamat ha pagtapod nga iginhatag ni Presidente Ferdinand Marcos Jr. nga pagmanguluhan an ahensya nga gintawag hine nga ”critical time for our country’s energy future.”
Gintagan-duon han sekretarya an importansya han pagtutok ha seguridad, sustainability, ngan abot-kaya nga presyo han kuryente para ha mga Pilipino.
Ginpatapod gihapon ni Garin nga padayon hine nga igduduso an mga polisiya ngan reporma nga iginlatag han mga naglabay nga sekretarya han DOE, sugad kan anay Energy Secretary Raphael Lotilla, nga nakapokus ha pagpapadagmit han pagribhong han renewable energy, pagpapahaluag han electrification, pagpapakusog han energy resiliency, ngan pagpapaupay han klima para ha mga mamumuhunan.
Ginmalatumat gihapon hine an mga programa han ahensya sugad han Green Energy Auction ngan an padayon nga paghitaas han kapasidad han renewable energy kumo baton ha polisiya han Presidente, nga kadukot han mas haluag nga panuyuan para ha ”inclusive and sustainable national development.”
Samtang, nanawagan naman hi Garin hin pakikigbinuligay ha ngatanan han sektor, pagsunod ha transparency, ngan pagkarawat ha mga makabag-o ngan sakto nga solusyon agud masigurado an ”reliable, secure, and sustainable energy future” para ha mga Pilipino.
