TACLOBAN CITY – Gin malatumat ni Kapitana Rose Emphasis han Brgy. 5-A Tacloban City nga may-ada gihapon kaupayan an pag-ugsod han eleksyon ha masunod nga tuig para ha mga sugad haiya nga last-termer.
Sumala pa kan Emphasis, kun mau-ugsod an piniliay ha masunod nga tuig in magkakamay-ada pa hiya hin higayon nga makaghimo hin kadugangan nga mga proyekto nga makakaupay ha ira barangay.
Dugang pa hini, gamiton la anay ha paghahatag hin bulig ha mga apektado han presente nga krisis ha nasud an salapi nga nakatalaan gamiton yana nga piniliay agud makabulig gihapon ha ekonomiya.
Ha lain nga bahin, ginmalatumat ni Emphasis nga kun madadayon man an piniliay in igpadayon han mabalyo ha pwesto an mga programa ngan proyekto han nakalabay nga administrasyon labi na kun kaupay ini mahitungod nga an paglingkod ha pwesto in pagserbisyo ha mga molupyo ngan dire ha pankalugaringon nga interes.
