TACLOBAN CITY – Umulpot na yana nga adlaw ha Guiuan Eastern Samar an Juan Sebastian Elcano training ship han Spanish navy para ha reenactment hini ha mga gin-agian ha ekspedisyon nga ginpangunahan ni Ferdinand Magellan.
Ini in kasumpay ha selebrasyon han ika-500 katuig han first circumnavigation ha kalibutan ngan sugadman an quincentennial celebration han Kristyanismo ha Pilipinas.
Sumala kan Mayor Analiz-Gonzalez Kwan han Guiuan, Eastern Samar, magpapabilin an mao nga tall ship nga nakaduong ha Guiuan port terminal ha sakob hin pira kaadlaw san-o nga kumadto ha Limasawa island tungod nga ginbabaybay han mao nga barko an mga gin-agian nira Magellan ha naging ekspedisyon hini, 500 katuig na an nakakalabay.
Dire naman tutugutan nga makasaka o makasakob ha barko an mga katawhan ngan dire gihapon malusad an mga crews ngan opisyal nga ada ha sakob han barko kumo paghihirot kontra COVID-19.
Samtang, padayon naman an mga gindudumara nga aktibidad ha Guiuan kasumpay la gihapon ha selebrasyon kun diin presente an pira nga mga delegado ngan bisita kalakip na an Ambassador of Spain to the Philippines nga hi Jorge Moragas Sanchez.
Ha naging mensahe hini kakulop ha Launching han Guiuan Museum Design ngan exhibit, ginbalikan ni Ambassador Sanchez an nahitabo han nakalabay nga 500 katuig kun diin gintawag hini nga “fruitful touch” an pinakasyahan nga Philippine-Spanish contact nga nahitabo mismo ha Homonhon ha Guiuan, Eastern Samar.
