TACLOBAN CITY – Nakadepende pa ha magiging resulta han swab test ngan contact tracing han mga nakasalamuha han syahan nga positive case han COVID-19 ha Lawaan, Eastern Samar kun papahilawigon pa an lockdown nga ginpapatuman ha barangay kun diin tikang an mao nga pasyente.
Una hini, ginpailarom ha 72 oras nga lockdown an bug-os nga barangay han Maslog, Lawaan agud nga matagaan hin iwag an contact tracing.
Sumala kan Lawaan Mayor Athene Mendros, nakadepende ha magiging resulta han swab test han duha nga paryente nga naka-close contact han pasyente kun magkaada hin extensyon han lockdown ha mao nga barangay.
Dugang pa hini nga kun magpositibo gihapon an mga ini ha mao nga sakit in posible liwat nga magdumara hin community mass testing.
Nahibaruan nga an mao nga pasyente in usa nga 65 anyos nga babaye nga inmulpot ha Lawaan tikang abroad ngada pa han bulan han Marso, ngan cleared in kumo person under monitoring mahuman nga makompleto an mandatory 14 day quarantine period.
Boluntaryo ini nga nagpailarom ha swab testing han nakalabay nga semana tungod nga usa nga resikitos an health certificate hini para makabalik hiya ha langyaw nga nasud pero gumawas ha resulta nga positibo ini ha COVID-19.
Mahitungod nga tikang pa han Marso an an pag-ulpot han mao nga pasyente ha Lawaan in mas halawig an gindudumara nga contact tracing ha mga nakasalamuha hini tikang han mao na bulan.
