Umursa hin 2.3% an ekonomiya han Pilipinas ha ikaduha nga kwarter han 2026, mas mahinay kumpara ha 2.8% nga pag-ursa dida han syahan nga quarter, ngan ha 5.4% nga nahipatik ha kaparehas nga panahon dida han nakalabay nga tuig.
Kaupod ha mga pangunahaon nga nagdugang ha pag-ursa an wholesale ngan retail trade ngan repair han motor vehicles ngan motorcycles nga umursa hin 4.6%, edukasyon nga 12.7%, ngan manufacturing nga 2.6%.
Samtang, humitaas naman hin 2.2% an gross national income (GNI), nga nagsusukot ha kabug-usan nga kita han mga Pilipino ngan negosyo han nasud kaupod an kinikita tikang ha iba nga nasud.
Mas mahinay naman an GDP growth, nga nakapukos ha kantida han produksyon ngan aktibidad pan-ekonomiya ha sulod mismo han nasud.
Sumala kan Department of Economy, Planning and Development Secretary Arsenio Balisacan, nakaapekto an pag-ubos han investments an dako nga pag-iban han public construction. Iginsusumpay niya ini ha pag-undang o pagkadelatar han pira nga flood control projects kasunod han isyu han korapsyon ha mga proyekto. Umubos hin 9.2% an investments, kun diin an duro nga pag-ubos han public construction an pangunahon nga rason.
Agud makab-ot an target han gobyerno nga 3.5 kutob 4.5% nga annual economic growth yana nga tuig, ginmalatumat ni Balisacan nga kinahanglan umursa an ekonomiya hin 4.4% ha ikaduha nga quater han tuig.
Nangangaruyag-sidngon ini nga kinahanglan hin mas malaksi nga aktibidad ha ekonomiya ha mga masunod nga bulan agud mabawi an mahinay nga pag-ursa ha syahan nga katunga han tuig.
