TACLOBAN CITY – Ginkakalipay han Land Transportation Franchising and Regulatory Board (LTFRB) Regional Office 8 nga usa an Sinirangan Bisayas ha mga nangunguna nga rehiyon ha Pilipinas nga may hitaas nga compliance rate ha consolidation han public utility vehicles kaparte han transportation modernization program han gobyerno.
Sumala kan LTFRB 8 Regional Director Gualberto Gualberto, an Sinirangan Bisayas in nakakuha hin 96% nga compliance han mga operators nga nagpaconsolidate han ira mga PUVs kun diin an nasasalin nga 4% nga pakyas nga mag apply han consolidation in kasagaran nga tag-usa la an unit hin sarakyan ngan yana in dire na nabyahe.
Ini in pagpapakita naman han pagsunod han mga transportation entities ha rehiyon ha modernization program han gobyerno nga flagship program gihapon han LTFRB.
Samtang, ginpahayag gihapon hini an bahin han Local Public Transport Route Plan o LPTRP nga kun diin siyam na nga mga munisipalidad ngan tulo nga syudad an may approval ha pagpapatuman hini.
An mao nga LPTRP in parte gihapon han transport modernization program han gobyerno nga nagpapanuyo nga mapaupay an dalagan ngan ruta han mga drivers ngan commuters ha mga kakarsadahan.
