TACLOBAN CITY — Nakaghipatik na hin syahan nga positibo nga kaso hin COVID-19 an Sinirangan Bisayas.
Sumala kan Dra. Minerva Molon, Regional Director han DOH Regional Office 8, an pasyente in usa nga 51 anyos nga babaye nga nga nagbiyahe ha Japan ngan umabot ha Manila dida han Enero 2 ngan umuli naman ha Northern Samar dida han Marso 4.
Una anay ini nga nadiagnose hin severe acute respiratory infection an pasyente ngan makakagawas na unta ini ha hospital mahuman an 15 diyas pero mahisabutan liwat laboratory result tikang ha Research Institute for Tropical Medicine (RITM) kakulop nga adlaw nga positibo ini ha COVID.
Nagpapabilin liwat an pasyente ha Eastern Visayas Regional Medical Center (EVRMC) ngan ada na ha stable nga kondisyon.
Nagdumara na gihapon an buhatan panlawas hin contact tracing ha mga nakahalubilo hini ngan yana in ira mahugot nga ginmomonitor.
Nanawagan naman an DOH ha publiko nga magin kalmado ngan diri magpanic lugod batasanon an masukot nga paghuhuhas hin kamot, magin malimpyo ha lawas, magpabilin la ha sakob han panimalay ngan sundon an mga ginmamandu han gobyerno agud nga diri na kumalat pa an mao nga virus.
Ha pagkayana in ada ha 237 an ihap han mga patients under investigation (PUIs) ha rehiyon kun diin 1 dinhi in ha Biliran; 2 ha Borongan City; 34 ha Calbayog City; 40 ha Eastern Samar; 19 ha Leyte; 10 ha Maasin City; 59 ha Northern Samar; 4 ha Ormoc City; 42 ha Samar;15 ha Southern Leyte; 10 ha Tacloban ngan 1 ha Baybay City.
