TACLOBAN CITY – Nakatalaan nga ig-inagurisa han Department of Science and Technology – Philippine Institute of Volcanology and Seismology (DOST-PHIVOLCS) an nakompleto nga konstruksyon han Palo Seismic Station yana nga Marso 14, 2018 ha Brgy. Arado, Palo Leyte.
Mahuman an upat katuig in nakompleto han DOST-PHIVOLCS an reconstruction han mao nga stasyon para ha pagmonitor hin linog nga nadistroso han paglasurbo han bagyong Yolanda.
Ha pagkayana in ginpapaandar na ini pinaagi hin dual electricity source kun diin solar power an panguna nga source ngan sugadman commercial electricity.
Mahibabaruan nga padayon an pagpahilawig han PHIVOLCS ha ira Philippine Seismic Network pinaagi hin pag- establisar hin mga earthquake monitoring station ha bug-os nga nasud.
Pinaagi hini in mas magiging madali para ha probinsya han Leyte an pagdetect hin pagkakaada hin linog ngan an mas sakto nga parameters hini.
Samtang, mahuman an inagurasyon in magkaaada gihapon hin press conference an PHIVOLCS InfroSentro nga nagpapanuyo nga maghatag hin hibaro bahin han mao nga earthquake monitoring stations.
