Gin lalauman han Civil Aviation Authority of the Philippines (CAAP) an kutob 10% nga pagdamo han mga pasaheros ha mga paluparan yana nga Semana Santa, ha kaluyo han padayon nga paghitaas han petrolyo ha world market.
Subay ha panginano han ahensya, maabot ha 550,000 nga mga biyahero an maagi ha magkadiru-dilain nga paluparan ha nasud para ha Lenten break.
An nasabi nga ihap in kapansin-pansin nga mas hitaas kumpara ha 500,000 nga pasaheros nga nahipatik ha kaparehas nga panahon dida han nakalabay nga bulan.
Iginduon han CAAP nga waray magin balaong an mahal nga pamasahe mahitungod nga kaurugan han mga biyahero in nakagpareserba na han ira mga flights ugsa paman magtikang an tensyon ha Middle East nga nakaapekto hin dako ha suplay han krudo.
Gin kumpirma naman ini ni CAAP Public Information Officer Bea Bernardo.
Kumo baton ha sitwasyon ngan pitad agud maibanan an pas-anon han mga pasaheros, pati na gihapon han mga airlines ha butnga han serye han oil price hike, nauna na nga ginpahayag han CAAP an pag-iiban han mga ginsusukot hini nga aeronautical fees ngan Passenger Service Charges (PSC).
Ha ilarom han nasabi nga pitad, iginpaubos hin 50% an aeronautical fees, samtang gintagan naman hin diskwento nga maabot ha P5,000 an mga landing charges.
