Sumaka hi Alex Eala ha ika-30 nga pwesto han Women’s Tennis Association o WTA rankings ngan opisyal nga nakakuha hin makasaysayanon nga seeding para ha Wimbledon, rason agud magin pinakasyahan nga Pilipina nga matatagan hin seed ha main draw han usa nga Grand Slam tournament.
Sumaka hi Eala hin lima nga pwesto tikang ha ika-35, dida han nakalabay nga semana mahuman an iya pagsulod ha semifinals han WTA 500 Berlin Tennis Open.
Ha provisional draw han Wimbledon, ada na ini ha ika-29 nga seed mahuman umatras an Canadian nga hi Victoria Mboko mahitungod ha injury.
Kumo kaparte han Top 32 han WTA rankings, magkakamay-ada hi Eala hin mas maupay nga pwesto ha torneo nga pagbubuhaton tikang Hunyo 29 kutob Hulyo 12 ha London.
Ugsa an Wimbledon, makikigtumparak anay hiya ha WTA Bad Homburg Open ha Germany kun diin makakaupod niya ha double an pito kabeses na nga Grand Slam champion nga hi Venus Williams.
Bitbit ni Eala an impresibo nga 9-2 record ha grass court yana nga season, kaupod an iya kadaugan ha WTA 125 Birmingham Open ngan an malinangpuson nga kampanya ha Berlin kun diin ginperdi niya an pira nga hitaas nga ranked nga players.
Target naman yana han 21-anyos nga Filipina tennis star an mas maupay nga kampanya ha Wimbledon.
