TACLOBAN CITY – Sumurender na ha kapulisan an usa ha mga nakaeskapo nga preso ha Tacloban City Police Office.
Ginkilala an mao nga suspek nga hi Mark Paul Grabillo, 25 anyos an pangidaron ngan residente han Brgy. 62-A sagkahan, syudad han Tacloban.
Sumala kan PCI Rex Cantillep, hepe han City Public Saftey Company, gindurayhag hi Grabillo han iya bugto para sumurender ha kapulisan.
An pamahayag ni PCI Rex Cantillep, hepe han City Public Saftey Company
Kasumpay hini mahibabaruan nga nauna nga sumurender han nakalabay nga mga adlaw an kaupod ni Grabillo ha pageskapo nga hi Rogelio Lao, alyas “Buwaya”, 29 anyos ngan residente han Brgy. 36 Sabang.
Samtang, ha pagkayana in narelieve naman ha pwesto an jail guard nga nakaduty han manabo an mao nga insidente.
Mahibabaruan nga may kaso nga pagtalapas ha Section 5 ngan 11 han RA 9165 o Comprehensive Dangerous Drugs Act hi Lao samtang frustrated homicide naman an kaso ni Grabillo.
Mahinunumduman nga nakaeskapo an duha mahuman nga magpasangil nga diri nakakahinga hi Lao ngan samtang gindara in ha lobby han presuhan para magkaaada hin presko nga hangin in nakipagdulong naman hi Grabillo ha pulis nga nakabantay ngan dayon nga gin-abrehan ni Lao an gate para dumalagan tipagawas ngan sumunod naman hi Grabillo.
