TACLOBAN CITY – Duha nga mga bag-o nga municipal building iton pagtitindugon hiton Department of Public Works and Highways (DPWH) ha Eastern Samar nga makaghahatag pa hin mas maupay nga serbisyo ha mga tawo.
Agosto 27, yana nga adlaw gindumara an groundbreaking ceremony para han igtitindog nga 4 storey municipal building ha Taft ngan 3 storey nga municipal building ha Can-avid.
An bag-o nga munisipyo han Taft in igbubutang ha 3,360 square meters nga gindonar nga tuna.
Mayda ini inisyal nga pondo nga Php30million ngan titikangan pagtrabaho dida hiton Setyembre 11.
Lalauman liwat nga mahuhuman ini Mayo 1 sunod nga tuig.
Samtang, maabot liwat hin Php140million an pondo nga ginbutang para ha munisipyo ha Can-avid nga matatapos paghingayad ha sakob hin 1000 diyas.
An pondo han pareho nga proyekto in tikang ha General Appropriations Act (GAA) of 2023.
Mapasinalamaton naman hi Taft Mayor Gina Alzate- Ty ngan Can-avid Mayor Vilma Germino kan House Minority Leader ngan 4Ps Partylist Representative Cong. Marcelino Libanan nga naniguro para mapondohan ini nga mga proyekto.
“This is a realization of our long time dream nga maliliwan na an aton munisipyo after 55 years.This municipal building is a symbol of our service for our people. Salamat Cong.Libanan para ha pondo hini nga proyekto “, pulong ni Mayor Alzate-Ty.
“Iton aton munisipyo senior citizen na. Mayda na portion nga naturo na. Sanglit, napapanahon na ngan angay la kita magkaada hin mahusay ngan maanyag nga munisipyo”, pahayag ni Mayor Germino
