TACLOBAN CITY- Ginpahibaro han buhatan hiton Department of Trade and Industry DTI regional office-8 ha publiko, kasumpay ha nahihitabo nga paghitaas gihapon han pira nga mga pangunahon nga papliton ha pira nga mga establisyemento ha bug-os nga Sinirangan Bisayas.
Sumala kan Aivie Borbon Ancheta, Information Officer han DTI regional office-8, nga subay ha ira gindumara nga monitoring ha tulo nga dagko nga establisyemento dinhe ha syudad, mayda hira mga nakit-an nga pag-increase han pira nga papliton tikang ha ira anay suggested retail price o kun SRP.
Dugang pa han mao nga opisyal, kalakip ha mga nag-umento an presyo amu an instant coffee, export candle ngan iba pa.
Ha mao nga pagpatuman han increase han nasabi nga items, kinahanglan nga magpasa an establisyemento hin Letter of Explanation, kun kay-anu hira nagpatuman hin pag-increase han presyo.
Ginmalatumat naman han mao nga opisyal, pananglitan naman nga considerable an ira rason, ine naman in igkokonsidera han ira buhatan.
Mababaruan nga transportasyon an syahan nga rason kun kay-anu may paghitaas han presyo han pira nga pangunahon nga papliton, kun diin kasumpay gihapon ine ha padayon nga paghinitaas han presyo hiton produktong petrolyo ha bug-os nga nasud.
