Gin anunsyo han Department of Social Welfare and Development (DSWD) an paghitaas han alokasyon han pondo para ha Supplementary Feeding Program (SFP), nga panuyo mapa-upay an panlawas ngan nutrisyon han kabataan nga naka-enrol ha Child Development Centers (CDC) ngan Supervised Neighborhood Play (SNP).
Pinaagi han feeding sessions, maghahatag hin gatas ngan masustansya nga mapaso nga pagkaon ha mga kabataan.
Ginpahitaas naman ha P9.26 bilyon an budget para ha Supplementary Feeding Program para ha tuig-2026, tikang ha P5 bilyon nga alokasyon dida han 2025.
Ginpahilawig gihapon an kaiha han program, kun diin an daily feeding session in nagin 180 kaadlaw na tikang ha dati nga 120 kaadlaw.
Dugang pa hine, ha mga probinsya nga mayda hitaas nga insidente han kakurian, humitaas an ihap han mga sakop han Child Development Centers tikang ha 5,284 hadton 2025, tikadto ha 7,824 yana nga 2026, agud mas damo nga kumunidad pa ha tay-aw nga mga lugar an maabot han nasabi nga serbisyo.
Padayon naman nga nakikig-sumpayan ngan nakikigbinuligay an DSWD ha pangunguna ni Sec. Rex Gatchalian ha mga lokal nga pangobyernuha agud masigurado an maupay nga pagpapatuman han Supplementary Feeding Program ha bug-os nga nasud.
