TACLOBAN CITY – Ginpatapod hiton Department of Transportation (DOTr) nga tatapuson an paghingayad han Ormoc Airport mahuman ini madestroso han nakalabay nga super typhoon Yolanda ngan han nakalabay nga linog han 2017.
Sumala kan DOTr Secretary Arthur Tugade kumbinsido an administrasyon Duterte nga kinahanglan matapos an konstruksyon hini tungod nga ha Ormoc ngan ha mga kahirani nga bungto hini namumutang an primero nga destinasyon ha western part han Leyte.
An pagrehabilitar hini an maghahatag hin dalan para maaghat an mga tag iya hin airlines nga magbutang hin commercial flights.
Hini nga pamaagi magigin mas maribhong pa an ekonomiya ngan turismo han syudad.
“The government is actively pushing for developments in Ormoc to help boost not only the city’s but also Leyte province’s trade, economy, and tourism. ” ginpahayag ni Tugade durante ha iya pag- inspeksyon.
Mababaruan nga ha Ormoc City namumutang an mga sikat nga tourist destination sugad nala han Lake Danao, Tongonan Hot Springs National Park, ngan Alto Peak, an pinakahitaas nga bukid ha Sinirangan Bisayas.
Hirani la liwat ini ha Kalanggaman Island, usa ha gindadasig nga tourist destination ha Palompon, Leyte.
Ini nga airport in namumutang ha ngahaw ha Barangay Airport han Ormoc ngan may total area nga ginpahiluag tikang ha 150 ngadto 1,350 square meters.
An paghingayad hini in ginkakalakipan han renovation hiton passenger terminal building nga nagkakantidad hin sobra Php 90 milyones ngan construction ha CAAP administration building.
Labot la hini nagtikang liwat an Php 34 million rehabilitation project ika 1 han Pebrero 2018 nga implementar ini han DOTr kaupod an DPWH.
Padayon naman an rehabilitasyon han runway hini nga mayda kalapad nga 2,042m x 36m nga ginpondohan hin Php 55 million ngan target matapos ha 2020.
Nag alutaga liwat hin pondo nga PhP 82-million para ha asphalt overlay ngan strip grade correction project nga yana in 61% completion rate.
Nagpasalamat naman hi Mayor Richard Gomez kan Presidente Rodrigo Duterte nga gintagan hini hin prayoridad an paghingayad han Ormoc Airport.
