TACLOBAN CITY – Padayon an pangandaman han Department of Tourism (DOT) Regional Office ha ginlalauman nga pagdamo han volume han mga turista nga mabisita ha magkadirudilain nga mga tourist destinations ha Sinirangan Bisayas.
Sumala kan Karen Tiopez, Regional Director han DOT Regional Office 8, ginlalauman na nira an pagdamo han mga turista ha rehiyon yana nga summer vacation labi na nga ginpahuruhukal na an mga restricitions ngan aludayday nga ginpapatuman ha pagpapasulod ha mga tourist destinations ha rehiyon.
Kaparte han ira pangandaman han responsible tourism restart ha Eastern Visayas amo an pagpapagawas hin mga advisories ngan trainings agud nga mapaupay pa an kapasidad han magkadirudilain nga destinasyon ha rehiyon ha ira paghahatag hin serbisyo ngan mga produkto samtang ginsisiguro nga nasusunod la gihapon an mga health protocols kontra COVID-19.
Kasumpay hini, nakapag establisar na gihapon an pira nga mga tourist destination ha rehiyon han ira mga carrying capacities sugad han Mahagnao Volcano ha Burauen, Kalanggaman Island, Lake Danao, San Pablo Island, Canhugas Nature Park ngan iba pa.
Mahugot naman nga ginmomonitor han DOT kun sakto an mga carrying capacities han mao nga mga tourism destinations ngan agud nga masiguro kun nasusunod an mga ini.
